Maritim veke: Rekordmange på sjøtryggleikskonferansen
Det var rekorddeltaking då årets sjøtryggleikskonferanse under Maritim veke i Haugesund opna torsdag. Nær 420 deltakarar fylte salen då sjøfartsdirektør Alf Tore Sørheim ønskte velkomen.
I opningstalen løfta Sørheim fram nullvisjonen og arbeidet med å styrkje tryggleiken på sjøen.
– Eg går på jobb kvar dag med eitt mål for auge: At det vi gjer saman kan redde
liv på sjøen, sa sjøfartsdirektøren i sitt opningsinnlegg.
Årets program dekker fleire sentrale tema:
- Ulykkestala frå 2024 og status for 2025
- Nullvisjonen og tryggleiksarbeidet framover
- Nye regelverk, som batteriforskrifta og begroingsforskrifta
- Resultat frå undersøkingar om maritim tryggleik
- Arbeidsmiljø, helse og læring av hendingar
- Datakvalitet i norske sjøkart
- Kompetansebehov knytt til nye drivstoff som ammoniakk
- Korleis skape tryggare og meir inkluderande arbeidsplassar
Konferansen samlar breitt frå næring, forsking og forvaltning, og er blitt ein viktig arena for å dele erfaringar og kunnskap for å hindre ulykker og styrke sikkerheitskulturen i maritim sektor.
Maritim veke samlar folk frå heile den maritime næringa – frå beslutningstakarar til tilsette og samarbeidspartnarar. Målet er å skapa ein felles møtestad for møte, læring og samarbeid.