Hopp til hovedinnhold
Rundskriv

Forskrift om oppheving av forskrift om begrenset fart ved passering av badende og om forbud mot ferdsel m.v. innenfor oppmerkede badeområder

Sjøfartsdirektoratet har fastsett oppheving av forskrift 24. februar 1983 nr. 624 om begrenset fart ved passering av badende og om forbud mot ferdsel m.v. innenfor oppmerkede badeområder.

Dato: 27. september 2023
Serie RSR
Nummer RSR 5 - 2023
Saksnummer 2021/123017-13
Vedlegg Last ned som PDF

Bakgrunn

Som følge av Samferdselsdepartementet si fastsetting av forskrift 19. april 2021 nr. 1214 om fartsgrenser på sjøen, blei det i april og mai 2021 sendt spørsmål til Sjøfartsdirektoratet om forskrift 24. februar 1983 nr. 624 om begrenset fart ved passering av badende og om forbud mot ferdsel m.v. innenfor oppmerkede badeområder burde bli oppheva.

På bakgrunn av desse førespurnadane, gjorde Sjøfartsdirektoratet ein gjennomgang av den historiske utviklinga av regelverket om fartsgrenser på sjøen. Gjennomgangen viste tydeleg at forskrifta burde bli oppheva. Forskrifta hadde heimel i sjølovane av 1893 og 1994, men den materielle forskriftsheimelen i den gjeldande sjøloven blei oppheva i 2007. Etter dette har forskrifta hatt eit uklart heimelsgrunnlag, noko som blei vurdert som eit sterkt argument for oppheving. Vidare var det, i samanheng med utviklinga av fartsforskriftene med heimel i havne- og farvannsloven, planlagt at forskrifta skulle bli oppheva allereie i 2009. At dette ikkje blei gjort, kan etter alt å dømma tilskrivast ein inkurie. For ein meir utførleg gjennomgang av historikken bak, viser Sjøfartsdirektoratet til høyringsbrevet.

Økonomiske og administrative konsekvensar

I tillegg til den historiske gjennomgangen, har Sjøfartsdirektoratet gjort ei vurdering dei moglege konsekvensane av oppheving av forskrifta. Ei samanlikning med andre gjeldande reguleringar av fartsgrenser på sjøen, viser at forskrifta i all hovudsak er ført vidare i andre forskrifter og lovar, slik at ei oppheving berre vil føre til små endringar i regelverket. Den einaste endringa som det er sannsynleg at kan få praktiske og økonomiske konsekvensar, er fjerninga av unntaket ved låssetting av fisk i posenot. Verknaden av dette er truleg uansett liten, og endringa er forsvarleg utgreidd og grunngitt. For ei meir utførleg vurdering av konsekvensane av framlegget, viser Sjøfartsdirektoratet til høyringsbrevet.

Høyringa

Framlegget om oppheving var på høyring frå 29. november 2021 til 10. januar 2022. Høyringsperioden var avgrensa til seks veker, sidan det vesentlege innhaldet i framlegget tidlegare hadde vore oppe til høyring med ordinær høyringsfrist.

Sjøfartsdirektoratet fekk inn fire høyringssvar. Møre og Romsdal Fiskarlag og Fiskarlaget Vest hadde innvendingar mot framlegget.

[…Vi vil med dette uttrykke sterk skepsis til oppheving av forskriften, da Fartsgrenseforskrifta av 1983 § 3 nr 1 har et unntak frå forbodet mot ankring og ferdsel innanfor merkebøyene, som gjeld ferdsel i samband med «ervervsmessig låssetting av fisk i posenot». Ovennevnte unntak er ikke tatt inn i fartsgrenseforskrifta av 2021. Møre og Romsdal Fiskarlag og Fiskarlaget Vest går derfor i mot forslaget om oppheving av forskriften så lenge ikke unntaket blir tatt inn i ny forskrift.]

Sjøfartsdirektoratet viser til at deler av denne føresegna allereie er overført til den nyare forskrifta om fartsgrenser på sjøen, jf. denne § 3. I samband med fastsetjinga av den nye forskrifta, tok departementet stilling til føresegna om låssetting innanfor bøyene, sjå punkt 7.4. i høyringsnotatet.

[…Arbeidsgruppen foreslår å fjerne unntaket for ervervsmessig låssetting av fisk i posenot. Vi kan ikke se at dette er forenlig med at badeplassen merkes som offentlig. Vi mener at kommunen bør unngå å tilrettelegge for offentlig badeplass i tilfeller hvor det finnes privatrettslige rettigheter knyttet til et område som kan komme i konflikt med bruken av området som badeplass.]

Det vart samtidig teke ein føresetnad om at Sjøfartsdirektoratet vil oppheve forskrift om avgrensa fart ved passering av badande og om forbod mot ferdsel m.v. innanfor oppmerka badeområde.

Iverksetjing

Opphevinga trer i kraft straks.